Ang pag-ibig ay katapangan

pagkasa ng baril na itututok sa sarili mong sentido

at pag-asang hindi siya ang kakalabit

sa gatilyong kikitil sa iyo.

 

Ang pag-ibig ay pagtataya

sa sugal ng kasiyahan at lumbay

at pagnanais na makamit

ang di mapapantayang saya

ng walang hanggan.

 

Ang pag-ibig ay pag-asa

na ang sinimulan ay walang katapusan

at pagiging handa

sa pagdating ng hangganan

ng sinumpaang walang hanggan.

 

Ang pag-ibig ay pagtanggap

sa sakit at hirap

pakikisalo sa dusa at saya

pagyakap sa kanyang kabuuan

paghaplos sa kanyang kaluluwa

pagdepensa sa husga ng mga diyos

paglikha ng sarili nyong langit.

 

Ang pagibig ay pagsuong

sa digma ng tadhana

armas ng natitirang giting

paglaban sa nais bumuwag

hapdi ng maaaring pagpanaw

pagwawagi sa pinaglabang damdamin

kabayanihan sa kabila ng pagsuko.

 

Ang pag-ibig ay pagkabulag

pagkamanhid ng iyong pandamdam

pagtiis sa sampal ng pagkabigo

pagdama sa sarap ng sakit

pagkuha ng lakas sa lahat ng pangako

pagkabuhay mula sa paghihingalo.

 

Ang pag-ibig ay patibong ng langit

misteryo ng isang matinding mahika

walang makatatakas sa dulot na saya

sa hipnotismo ng patuloy na pagtibok

lahat ay nagiging makata

sa liriko ng pinagsasaluhang awit.

 

Ang pag-ibig ay pagkahulog

sa masalimuot na bitag ng pagsinta

at di na muling pagtakas

sa rehas ng ligaya.

 

______________________________

Para sa lahat ng tulad kong nahulog sa bitag.